Чин, бываемый в Неделю Православия  

По прочтении часов стоящу Архиерею на обычном месте в облачении исходят от олтаря Архимандрити, Игумени, Иереи и Диакони: иереи же износят икону Спасителеву и Богородичну, и полагают среди церкве на аналогии. (Аще же несть Архиереа – творится чин Последования молебного пения «О обращении заблудших», изданнаго отдельной брошюрой). 

Протодиакон начинает: Благослови, Владыко. 

Архиерей: Благословен Бог наш, всегда, ныне и присно и во веки веков. 

Лик: Аминь.  И поют: Царю Небесный: 

Чтец: Трисвятое: Отче наш: Господи помилуй (12). Придите поклонимся, трижды, таже псалом 74: Исповемыся Тебе, Боже, исповемыся: Слава и ныне: Аллилуиа, аллилуиа, аллилуиа, слава Тебе, Боже: (трижды) 

Таже диакон глаголет ектению мирную даже до: О плавающих, путешествующих: и абие прилагает сие:

О еже милостивым оком призрети на Святую Свою Церковь и соблюсти Ю невредиму и непреобориму от ересей и суеверий, и миром Своим оградити, Господу помолимся. 

О еже утишити раздирание Ея, и силою Святаго Духа обратити всех отступльших к познанию истины, и сопричести к избранному Своему стаду, Господу помолимся. 

О еже просветити мысли, неверием помраченным, светом Своего Богоразумия: верных же Своих укрепити и непоколебимых в правоверии соблюсти, Господу помолимся. 

О избавитися нам: и дальше. 

Заступи, спаси, помилуй: 

Пресвятую, пречистую: 

Архиерей возглас: Яко подобает Тебе всякая слава, честь и поклонение, Отцу и Сыну и Святому Духу, ныне и присно и во веки веков. 

Лик: Аминь. 

По сем: Глас 4-й, Бог Господь и явися нам, благословен грядый во Имя Господне.  

Стих 1-й: Исповедайтеся Господеви, яко Благ, яко в век милость Его. 

Стих 2-й: Обышедше обыдоша мя, и именем Господним противляхся им. 

Стих 3-й: Не умру, но жив буду, и повем дела Господня. 

Стих 4-й: Камень, егоже небрегоша зиждущии, сей бысть во главу угла: от Господа бысть сей, и есть дивен во очесех наших. 

Таже тропари: 

Благодарни суще недостойнии рабы Твои, Господи, о Твоих великих благодеяниях на нас бывших, славяще Тя хвалим, благословим, поем, и величаем Твое благоутробие, и рабски любовию поем Ти: Благоутробне Спасе наш, слава Тебе. 

Слава: глас 3. 

Твоих благодеяний и даров туне, яко раби непотребни сподобльшеся, Владыко, к Тебе усердно притекающе, благодарение по силе приносим и Тебе, яко Благодетеля и Творца славяще, вопием: слава Тебе, Боже прещедрый. 

И ныне: глас 4. 

Якоже вышния тверди благолепие, и нижнюю споказал еси красоту святаго селения славы Твоея, Господи, утверди сие во век века, и приими наша в нем непрестанно приносимая Тебе моления, Богородицею, всех Животе и Воскресение. 

Протодиакон: Вонмем. 

Архиерей: Мир всем. 

Чтец: И духови твоему. 

Протодиакон: Премудрость, вонмем. 

Чтец: Прокимен, глас 4: Насаждени в дому Господни, во дворех Бога нашего процветут.

Стих: Возвеселится праведник о Господе, и уповает на Него. 

Апостол к Римляном, зачало 121 (глава 16, стихи: 16-20).

Евангелие от Матфея, зачало 75 (глава 18, стихи: 10-18). 

По сем диакон ектению: Помилуй нас, Боже, по велицей милости Твоей, молимся Ти ся, услыши и помилуй. 

По: Еще молимся о Православном Епископстве гонимыя Церкви Российския: присовокупляются сия: 

Не хотяй смерти грешных, но ожидаяй обращения и покаяния, обрати всех отступльших, к Святей Твоей Церкви, молимтися, милосердный Господи, услыши и помилуй. 

Устроивый мiр сей в славу Твою, сотвори да и противящияся Твоему слову обратятся, и вкупе со всеми верными истинною верою, и благочестием Тебе Бога нашего прославят, молимтися, всемилосердный Творче, услыши и помилуй. 

Давый заповедь Твою нам, еже любити Тебе Бога нашего и ближняго своего, сотвори, да ненависти, вражды, обиды, мздоимства, клятвопреступства, и протчая беззакония прекратятся, истинная же любовь да царствует в сердцах наших, молимтися, Спасителю наш, услыши и милостивно помилуй. 

Архиерей, возгласно: Услыши ны, Боже Спасителю наш, упование всех концев земли, и сущих в мори далече: и милостив, милостив буди, Владыко, о гресех наших, и помилуй ны. Милостив бо и Человеколюбец Бог еси, и Тебе славу возсылаем Отцу, и Сыну, и Святому Духу, ныне и присно, и во веки веков. 

Лик: Аминь. 

Протодиакон: Господу помолимся. 

Лик: Господи помилуй. 

И Архиерей глаголет молитву: 

Всевышний Боже, Владыко и Содетелю всея твари, наполняяй вся величеством Твоим, и содержай силою Твоею! Тебе вседаровитому Господу нашему мы недостойнии благодарение приносим, яко не отвращаешися нас беззаконий ради наших: но паче предваряеши ны щедротами Твоими. Ты ко избавлению нашему послал еси единороднаго Твоего Сына, и благовестил безмерное Твое к роду человеческому снизхождение: яко хотением хощеши, и ожидаеши, еже обратитися нам к Тебе, и спасенными быти: Ты снизходя к слабости и немощи нашего естества, укрепляеши нас всесильною Святаго Твоего Духа благодатию, утешаеши спасительною верою, и совершенною надеждою вечных благ, и руководствуя избранных Твоих в горний Сион, соблюдаеши яко зеницу ока. Исповедуем, Господи, великое Твое и безприкладное человеколюбие и милосердие.  Но видя многих поползновения, прилежно Тя, всеблагий Господи, молим: призри на Церковь Твою, и виждь: яко Твое спасителное благовестие аще и радостно прияхом, но терние суеты и страстей творит оное в некиих малоплодно, в некиих же и безплодно, и по умножению беззаконий овии ересьми, овии расколом противяся евангельской Твоей истине, отступают от достояния Твоего, отревают Твою благодать, и повергают себя суду Твоего Пресвятаго Слова. Премилосердный и всесильный, не до конца гневаяйся Господи, буди милостив, молит Тя Твоя Церковь, представляя Тебе Начальника и Совершителя спасения нашего, Иисуса Христа. Буди милостив им, укрепи их в правоверии силою Твоею, просвети им разумныя очи светом Твоим Божественным, да уразумеют Твою истину, умягчи их ожесточение, отверзи слухи, да познают глас Твой и обратятся к Тебе Спасителю нашему. Исправи, Господи, оных развращение и жизнь несогласную христианскому благочестию: сотвори, да вси свято и непорочно поживем: и тако спасительная вера укоренится, плодоносна в сердцах наших пребудет. Не отврати лица Твоего от нас, Господи, воздаждь нам радость спасения Твоего, подаждь, Господи, и пастырем Церкви Твоея святую ревность, и попечение об их спасении, и обращении заблуждающих, духом евангельским раствори: да тако вси руководими достигнем, идеже совершение веры, исполнение надежды, и истинная любовь: и тамо с лики чистейших небесных Сил прославим Тебе Господа нашего, Отца, и Сына, и Святаго Духа, во веки веков, аминь.   

По сем протодиакон, взяв благословение от Архиерея, и став на уготованном месте, возглашает, косно и низким гласом: 

Кто Бог велий яко Бог наш, Ты еси Бог творяй чудеса един. 

И паки возглашает сие вышшим гласом: Кто Бог велий яко Бог наш: 

Таже и третие сие возглашает, вышшим и светлейшим гласом: Кто Бог велий яко Бог наш: 

Таже глаголет сия: 

Православия день празднующе, православнии людие, наипаче прославим Виновника всех благ Бога, иже Сый благословен во веки.

Сей Бог наш, промышляя и утверждая возлюбленное Свое достояние, святую Церковь, праотцев, преступлением отпадших, утешая неложным Своим словом, еще в Раи основание Ей положи: Сей Бог наш, руководствуя ко оному спасительному обетованию, не несвидетельствована Себе остави, но хотящее быти спасение провозвестил первее чрез праотцев и пророков, живописал различными образы: Сей Бог наш многочастне и многообразне древле глаголавый отцем во пророцех, в последок дний сих глагола нам в Сыне, Имже и веки сотвори, Иже возвести Отчее о нас благоволение, откры таинства небесная, увери силою Святаго Духа о Истине благовестия, посла Апостолы во весь Мир проповедати Евангелие Царствия, утверди оное различными силами и чудесы. 

Сему спасительному Откровению последующе, сего Благовестия держащеся, Веруем во Единаго Бога Отца Вседержителя, Творца небу и земли, видимым же всем и невидимым. И во Единаго Господа Иисуса Христа, Сына Божия, Единороднаго, Иже от Отца рожденнаго прежде всех век: Света от Света, Бога истинна от Бога истинна, рожденна, несотворенна, единосущна Отцу, Имже вся быша. Нас ради человек и нашего ради спасения сшедшаго с небес и воплотившагося от Духа Свята и Марии Девы, и вочеловечшася. Распятаго же за ны при Понтийстем Пилате, и страдавша, и погребенна. И воскресшаго в третий день по Писанием. И возшедшаго на небеса, и седяща одесную Отца. И паки грядущаго со славою судити живым и мертвым, Егоже Царствию не будет конца. И в Духа Святаго, Господа, животворящаго, Иже от Отца исходящаго, Иже со Отцем и Сыном споклоняема и сславима, глаголавшаго пророки. Во едину Святую, Соборную и Апостольскую Церковь. Исповедуем едино крещение во оставление грехов. Чаем воскресения мертвых. И жизни будущаго века. Аминь. 

Таже, косно и ясным гласом возглашает: 

Сия Вера Апостольская, сия Вера Отеческая, сия Вера Православная, сия Вера вселенную утверди. 

Таже паки глаголет: 

Еще же и соборы святых Отец, и их предания и писания Божественному Откровению согласная, приемлем и утверждаем. 

Аще сему Господню о нас промышлению и откровению спасительному врази Православия и противишася, но помяну Господь поношения раб Своих: хульники бо славы Своея поруга, и продерзатели и враги Православия боязненны и бежатели яви. 

Якоже убо пленяющих разум свой в послушание Божественному Откровению и подвизавшихся за Оное ублажаем и восхваляем: тако противящихся сей Истине, аще ожидавшему их обращения и раскаяния Господу не покаяшася, Священному Писанию последующе и первенствующия Церкве преданий держащеся, отлучаем и анафематствуем. 

Таже яснейшим гласом глаголет: 

Отрицающым бытие Божие и утверждающим, яко мiр сей есть самобытен и вся в нем без промысла Божия и по случаю бывает, Анафема! 

И возглашает Архиерей со всем клиром: Анафема, трижды, таже певцы или людие возглашают Анафема, трижды. И бывает сие по коемждо анафематствовании. 

Таже паки глаголет протодиакон: 

Глаголющым Бога не быти дух, но плоть; или не быти Его праведна, милосерда, премудра, всеведуща, и подобная хуления произносящым, Анафема! (трижды). 

Дерзающым глаголати, яко Сын Божий не единосущный и не равночестный Отцу, такожде и Дух Святый, и исповедающым Отца, и Сына, и Святаго Духа не единаго быти Бога, Анафема! (трижды). 

Безумне глаголющым, яко не нужно быти ко спасение нашему и ко очищению грехов пришествие в мiр Сына Божия во плоти, Его вольное страдание, смерть и воскресение, Анафема! (трижды). 

Не приемлющим благодати искупления Евангелием проповеданнаго, яко единственнаго нашего ко оправданию пред Богом средства, Анафема! (трижды). 

Дерзающым глаголати, яко Пречистая Дева Мария не бысть прежде рождества, в рождестве и по рождестве Дева, Анафема! (трижды). 

Неверующым, яко Дух Святый умудри пророков и апостолов и чрез них возвести нам истинный путь к вечному спасению, и утверди сие чудесами, и ныне в сердцах верных и истинных христиан обитает и наставляет их на всякую истину, Анафема! (трижды). 

Отмещущым безсмертие души, кончину века, суд будущий, и воздаяние вечное за добродетели на небесех, а за грехи осуждение, Анафема! (трижды). 

Отмещущым вся таинства святая, Церковию Христовою содержимая, Анафема! (трижды). 

Отвергающым соборы святых Отец и их предания, Божественному Откровению согласная, и Православно-Кафолическою Церковию благочестно хранимая, Анафема! (трижды). 

Помышляющым, яко православнии Государи возводятся на престолы не по особливому о них Божию благоволению и при помазании на царство дарования Духа Святаго к прохождению великаго сего звания на них не изливаются: и тако дерзающым противу их на бунт и измену, Анафема! (трижды). 

Ругающым и хулящым святыя иконы, ихже Святая Церковь к воспоминанию дел Божиих и угодников Его, ради возбуждения взирающих на оныя ко благочестию, и ко оных подражанию приемлет, и глаголющым оныя быти идолы, Анафема! (трижды). 

Теософом и прочым еретиком, дерзающым глаголати и пребезумне учити, яко Господь наш Иисус Христос не единожды на землю сниде и воплотися, но множицею воплощашеся, такожде и отрицающым, яко истинная премудрость Отчая есть Сын Его единородный и вопреки Божественному Писанию и учению святых Отец ищущым иныя премудрости, Анафема! (трижды). 

Масоном, оккультистом, спиритом, чародеем и всем, иже не Единому Богу веруют, но бесов почитают, и не Богу смиренно жизнь свою предают, но чародейным бесов призыванием грядущее ведети тщатся, Анафема! (трижды). 

Отступающым от Православныя веры и приемлющым иныя исповедания на соблазн братиям нашим и отпадающым в расколы, Анафема! (трижды). 

Богопротивным человком злым, дерзнувшым даже и на убиение Помазанника Божия святаго Царя-мученика, Анафема! (трижды). 

Гонителем Христовыя Церкви, нечестивым отступником, подъявшим руки на священнослужителей Божиих, попирающым святыни, разрушающым храмы Божии, истязующым братию нашу и осквернившым Отечество наше, Анафема! (трижды). 

Нападающым на Церковь Христову и учащым, яко Она разделися на ветви, яже разнятся своим учением и жизнию, и утверждающым Церковь не сущу видимо быти, но от ветвей, расколов и иноверий соединитися имать во едино тело; и онем, иже не различают истиннаго священства и таинств Церкви от еретических, но учат, яко крещение и евхаристия еретиков довлеют ко спасению; и онем, иже имут общение с сими еретики или пособствуют им, или защищают их новую ересь экуменизма, мняще ю братскую любовь и единение разрозненных христиан быти, Анафема! (трижды). 

Соблазнителем и ругателем рода человеческаго и Богозданныя природы извратителем, сеющим разврат и над деторождением глумящимся, соблазняющым сестер наших детоубийство во утробах матерних творити и безвозрастных младенцев, яко бездушных извергати, еще же из их телес и крови скверную прибыль имати, Анафема! (трижды). 

Утверждающим антихристианскую ересь сергианскую; учащим, яко союзом с врагами Христа спасается Церковь Христова, и подвиг мученичества и исповедничества отвергающим, и на иудином основании лжецерковь устрояющим, и сего ради дозволяющим нарушать и искажать учение, каноны и нравственные законы христианские; заповедающим христианам поклонятися богоборческой власти, будто бы Богом данной, и служить ей не за страх, а за совесть, благословляя все ея беззакония; оправдывающим гонения на Истинную Церковь Христову от богоборцев, думая тем самым служить Богу, яко и совершали на деле продолжатели ереси обновленческой митрополит Сергий Страгородский и все его последователи, Анафема! (трижды). 

По сих же, паки глаголет протодиакон: 

Всем же о Православии подвизавшымся словесы, писании, учении, страдании и богоугодным житием, яко защитником и пособником онаго, Христова Церковь воспоминание творя, восклицает: 

Таже низким и мерным гласом: 

Святому Благоверному и Равноапостольному Царю Константину и матери его Елене, Феодосию Великому, Феодосию Юнейшему, Иустиниану и прочим православным Царем и Царицам греческим, Вечная память. 

И поют певцы: Вечная память (трижды). 

Таже протодиакон паки: 

Великим исповедником Святыя Православныя Веры, святым: Афанасию Великому, Архиепископу Александрийскому, отцу Православия, великим Вселенским Учителем и Святителем Василию Великому, Григорию Богослову и Иоанну Златоустому, Святителю Кириллу Александрийскому, Льву Великому и Флавиану Исповеднику, Отцем Седьми Вселенских Соборов, преподобному отцу нашему Максиму Исповеднику, святителю Мефодию, Патриарху Цареграда, преподобному отцу нашему Феодору Студиту, Святителю Марку, митрополиту Ефесскому и прочим Исповедником, Отцем и Учителем Церкве, о Ней подвизавшымся, Вечная память (трижды). 

Святому Благоверному и Равноапостольному Великому князю Владимиру, благоверней велицей княгине Ользе, Благоверным Великим князем Ярославу Мудрому, Владимиру Мономаху, святому Александру Невскому, Димитрию Донскому и прочим Благоверным Царем и Великим князем, царицам и великим княгиням, Благоверному Государю Царю Михаилу Феодоровичу, убиенному Царю-Освободителю Александру Николаевичу, Царю-Миротворцу Александру Александровичу и святому Благоверному страстотерпцу Царю-Мученику Николаю, святым Благоверным мучеником Царице Александре, Царевичу Алексию, Царевнам Ольге, Татиане, Марии и Анастасии и всем от рода Царей и Великих князей Российских преставльшымся и с ними же и убиенному Благоверному и Христолюбивому Государю и Кралю Югословенскому Александру и всем от рода православных Царей, Королей и князей, Вечная память (трижды). 

Всем святейшым Патриархом о Православии подвизавшымся, Константинопольским, Александрийским, Антохийским, Иерусалимским, Сербским и Румынским, и святейшым Патриархом Всероссийским: Иову, священномученику Ермогену, Филарету, Иоасафу-Первому, Иосифу, Никону, Иоасафу-Второму, Питириму, Иоакиму, Адриану, священномученику Тихону Исповеднику, святейшым Патриархом Димитрию, Варнаве и Гавриилу, и преосвященным Митрополитом, Архиепископом и Епископом православным, Вечная память (трижды). 

Священномучеником Митрополиту Киевскому Владимиру, Митрополитом Петроградским Вениамину и Иосифу, Архиепископом Гермогену, Андронику и Митрофану; Епископу Никодиму; Митрополитом Петру, Кириллу и Агафангелу; священномучеником во пресвитерех Иоанну, Петру и Иоанну; преподобномученицам велицей княгине Елисавете и инокине Варваре, верным сострадальцем мучеников Царственных и всем безчисленным святым и славным Новомучеником и Исповедником Церкве Российския, Сербския и Китайския, с ними же и Архимандриту Филумену и всем во всяцей стране мученически и исповеднически пострадавшым, Вечная память (трижды). 

Приснопамятным святителем и чудотворцем Иннокентию, Митрополиту Московскому, просветителю аборигенов Америки и Азии; Николаю, Архиепископу и просветителю Японскому и Иоанну, Архиепископу Шанхайскому и Сан-Францисскому; Ионе, Епископу Ханькоускому и Манчжурскому; преподобному и богоносному отцу нашему Герману Аляскинскому; священномученику Ювеналию и мученику Петру Алеуту и всем от рода нашего бывшым и во иныя страны свет истинныя Веры принесшым, Вечная память (трижды). 

Первоиерархом Русския Православныя Зарубежныя Церкви, Блаженнейшым Митрополитом Антонию и Анастасию, Митрополиту Филарету, Блаженнейшему Митрополиту Виталию, епископававшым во граде сем Епископом (имя- рек — преставльшихся епархиальных Архиереев, и всех подвизавшихся о Православии преставльшихся Архиереев, ихже изволит помянуть Архиерей), и всем преосвященным Митрополитом, Архиепископом и Епископом православным, Вечная память (трижды), 

жителем и монашествующым, Христолюбивым князем, боляром, и христоименитому воинству на поле брани и в разных походех за Православную Веру и многострадальное Отечество наше пострадавшым и убиенным, насильственно вывезенным и умученным, или в изгнании скончавшымся, Вечная память (трижды). 

Всем православным христианом во истинной Вере и благочестии и в надежде воскресения скончавшымся, Вечная память (трижды). 

Православная Церковь, торжественно воспоминая подвизавшихся во благочестии, и сие всем Своим христоименитым чадом к подражанию представляя, имеет такожде долг восхвалять подвиги, иже ныне спасительною Верою и добродетельно приуготовляя себе к вечному блаженству утверждают Православие. 

По сем возглашает: 

Священному Архиерейскому Русскому Заграничному Синоду, господину нашему Высокопреосвященному Митрополиту (имя рек), Первоиерарху Русския Зарубежныя Церкве, господину нашему Преосвященному Владимиру, Епископу Сан-Францисскому и Западно-Американскому (таже Архиепископу или Епископу — имя рек, его же область), и господину Преосвященному (Архиепископу или Епископу — имя рек, аще есть викарный) с клиром и паствою их, Многая лета (трижды). 

Православным Первоиерархом Святых Божиих Церквей, право правящым слово Истины, преосвященным Митрополитом, Архиепископом и Епископом и всему освященному причту, Многая лета (трижды). 

Благоверным людем страждущия страны нашея Российския во всех тяжких обстояниях их подаждь Господи на безбожническия козни крепость, от глада, губительства и междуусобных браней, благочестия же во Отечестве нашем возставление и Многая лета (трижды). 

Всем православным хриистианом право содержащым спасительную Веру, храмостроителем, благочестия ревнителем, и всем повинующымся Христовой Церкве, Многая лета (трижды). 

Посем Архиерей глаголет молитву: 

Святая Троице, сих прослави и утверди даже до конца в Правоверии: развратники же и хульники Православныя Веры и Христовы Церкве, и не повинующымся Оней обрати, и сотвори, да приидут в познание вечныя Твоея Истины, молитвами Пресвятыя Владычицы нашея Богородицы, и Приснодевы Марии, и всех Святых. Аминь. 

И по молитве сей абие Архиерей глаголет: 

Слава Тебе Богу, Благодателю нашему, во веки веков. 

Лик: Аминь.  

И поет следующую песнь святаго Амвросия: во время же пения тоя Архиерее, Архимапдрити, и все священное собрание целуют святыя иконы на аналогиах. 

Тебе Бога хвалим: Тебе Господа исповедуем: Тебе превечнаго Отца вся земля величает: Тебе вси ангели, Тебе небеса и вся силы, Тебе херувими и серафими непрестанными гласы взывают: свят, свят, свят, Господь Бог Саваоф, полны суть небеса и земля величества славы Твоея. Тебе преславный апостольский лик: Тебе пророческое хвалебное число: Тебе хвалит пресветлое мученическое воинство, Тебе по всей вселенней исповедует Святая Церковь, Отца непостижимаго величества: покланяемаго Твоего истиннаго и единороднаго Сына: и Святаго Утешителя Духа. Ты Царю славы, Христе: Ты Отца присносущный Сын еси, Ты ко избавлению приемля человека, не возгнушался еси девическаго чрева, Ты одолев смерти жало, отверз еси верующим Царство Небесное, Ты одесную Бога седиши во славе Отчей, Судия приити веришися. Тебе убо просим: помози рабом Твоим: ихже честною Кровию искупил еси. Сподоби со святыми Твоими в вечной славе Твоей царствовати. Спаси люди Твоя, Господи, и благослови достояние Твое: исправи я, и вознеси их во веки: во вся дни благословим Тебе, и восхвалим имя Твое во век, и во век века. Сподоби, Господи, в день сей без греха сохранитися нам: помилуй нас, Господи, помилуй нас, буди милость Твоя, Господи, на нас, якоже уповахом на Тя. На Тя, Господи, уповахом, да не постыдимся во веки, аминь. 

Таже бывает обычный отпуст. И абие начинается литургиа: аще же изволит Архиерей, последование сие бывает и пред окончанием литургии предписанным же образом.